Монгол Улсын дээд шүүхийн нийт шүүгчийн 2024 оны 1 дүгээр сарын 22-ны өдрийн хуралдаанаар дараах асуудлыг хэлэлцлээ.

1. Шударга иргэдийн нэгдсэн эвсэл нам (ШИНЭН)-аас ирүүлсэн “намын оноосон нэрийг ШИНЭ нам болгож өөрчилснийг улсын бүртгэлд бүртгүүлэх, гэрчилгээнд тэмдэглүүлэх” тухай өргөдлийг хэлэлцээд холбогдох хууль болон тус намын дүрэмд нийцсэн, татгалзах үндэслэл байхгүй гэж үзэж бүртгэхээр шийдвэрлэв.
2. Иргэний зориг ногоон нам (ИЗНН)-ын дарга Б.Батбаатараас ирүүлсэн “намын дүрмийн өөрчлөлтийг улсын бүртгэлд бүртгүүлэх” тухай өргөдлийн Улсын дээд шүүхийн хуралдааны 2018 оны 06 дугаар тогтоолоор оруулсан өөрчлөлттэй давхацсанаас бусад хэсгийг хэлэлцээд холбогдох хууль, тус намын дүрэмд нийцсэн тул бүртгэлээ.
3. Иргэн Д.Ганзоригоос ирүүлсэн “Их Монгол Засахуй ухаан нам (ИМЗУН)-ыг үүсгэн байгуулсныг улсын бүртгэлд бүртгүүлэх” өргөдлийг хэлэлцэж намын дүрэм, хуулийн шаардлагад нийцээгүй үндэслэлээр татгалзав.