Энэ Засгийн газар Ерөнхий сайдаасаа эхлээд ЗГХЭГ-ын дарга Д.Амарбаясгалан, ХЗДХ-ийн сайд Х.Нямбаатар нар хариуцлагын талаар байнга ярьдаг. Тооцож ч байх шиг байна.
Ер нь бол сахилга хариуцлагын талаар 2021 оны сүүлийн өдрүүдэд батлагдсан Шинэ сэргэлтийн бодлогод ч туссан. Тэнд “…Монгол төр хүчирхэг, шударга, ёс зүйтэй, сахилга хариуцлагатай байх ёстой” гэж бий.
Мөн хоёр, гуравхан хоногийн өмнө МЭК судалгааны байгууллагаас танилцуулсан судалгаанд оролцсон иргэдийн 34 хувь нь “…Ерөнхий сайд хариуцлага тооцдог учраас дэмжиж байна” гэж хариулсан байна лээ. Энэ нь өнгөрсөн жил утаагүй түлштэй холбоотойгоор БОАЖ-ын сайд Н.Уртнасанг, хэд хоногийн өмнө “…Ул” гэж ярьсан ХНХ-ын сайд Д.Сарангэрэл, өнгөрсөн зун Эрдэнэбүрэнгийн УЦС-ын төсөл дээр идэвхтэй ажиллаагүй гээд Ховдын Засаг дарга Б.Дүгэржавыг, Засгийн газрын бодлого дагаагүй ИНЕГ-ын дарга Л.Бямбасүрэнг чөлөөлсөнтэй холбоотой аж.
Гэсэн ч Засгийн газар өнөөдөр хэн ч хариуцлага ярьж чаддаггүй, хэнийг ч тоодоггүй нэг агентлагийн “занхар” даргатай болоод байна. Тэр нь ШШГЕГ-ын дарга, бригадын генерал Д.Загджав юм. Тэрбээр НАХЯ-ны Цэргийн дээд сургууль, ОХУ-ын Новосибирск хотын Эдийн засгийн удирдлагын академийг төгссөн. Дорноговь аймгийн Цагдан сэргийлэх хэлтэс, Ховд аймгийн АДХГЗ-ын дэргэдэх Хууль зүй, арбитрын хэлтэс, БОЯ-ны Төрийн нарийн бичгийн дарга, Хан-Уул дүүргийн Засаг дарга, “Алтай интернэйшнл” ХХК, УИХ-ын гишүүн, УУХҮ-ийн дэд сайдаар ажиллаж байгаад 2020 оын долдугаар сарын 22-нд ШШГЕГ-ын даргаар томилогдож, хурандаа цолтой болсон. Өнгөрсөн зун, долдугаар сарын 15-нд Бригадын генерал цол хүртсэн.
Энэ нөхрийг ШШГЕГ-ын дарга болсноос хойш тус газарт алдаа, зөрчил тасрахаа больсон. Тэр нь уртаас урт жагсаалт болчихоод байна.
-Өвөрхангай аймгийн Хархорин сум дахь ШШГЕГ-ын харьяа хорих 423 дугаар ангид ял эдэлж байсан хүн ил харагдах гэмтэл шархгүйгээр нас барсан.
-Сэлэнгэ аймгийн Мандал сум дахь ШШГЕГ-ын харьяа хорих 413 дугаар ангийн Цагдан хорих байранд саатуулагдаж байсан хүн учир битүүлгээр нас барсан.
-Өмнөговь аймгийн Ханбогд сум дахь ШШГХ-ийн Цагдан хорих байранд 64 настай Б ил харагдах гэмтэл шархгүй нас барсан.
-Сэлэнгэ аймгийн Мандал сум дахь ШШГЕГ-ын харьяа хорих 413 дугаар ангиас хоригдол оргосон.
-ШШГЕГ-ын харьяа хорих 441 дүгээр ангийн нягтлан бодогч албан тушаалаа урвуулж, хоригдлуудын “Тавантолгой түлш”-д ажиллаж нүүрс ууталсны хөлс болох төлбөрийн дансны хуулгыг зассан хэрэгт холбогдсон.
Хамгийн сүүлд Төв аймгийн Мөнгөнморьт сум дахь ШШГЕГ-ын харьяа хорих 417 дугаар ангийн дарга, дэд хурандаа О.Нямбаатар согтуудаа цагдаагийн офицерын биед халдсан байна. Цагдаагийн офицер хуулиар хүлээсэн нийтийн хэв журам сахиулах албан үүргээ гүйцэтгэж байх үед нь хорих 417 дугаар ангийн дарга, дэд хурандаа О.Нямбаатар зодсноос болж, толгойдоо гэмтэл авчээ. Одоо Гэмтлийн эмнэлэгт эмчлүүлж байгаа талаар эх сурвалжууд мэдээлжээ. Нөгөө талаас, тэднийг харилцан зодолдсон гэх мэдээлэл ч гарч байна. Уг хэргийг Төв аймгийн Цагдаагийн газрынхан шалгаж байгаа аж.
Ер нь бол ШШГЕГ төрийн тусгай чиг үүргийн байгууллага. Тэр утгаараа ШШГЕГ-ын дарга гэдэг албан тушаалтан Д.Загджав шиг ийм олон “боть” асуудал биш ганц л үйлдэл дээр буруутаж ажлаасаа чөлөөлөгддөг.
Тухайлбал, 2014 оны зун УИХ-ын гишүүн О.Баасанхүү ШШГЕГ-ын дарга, хурандаа Д.Ядамдоржийг огцруулахыг шаардсан албан бичгийг Засгийн газарт хүргүүлсэн. Тэрбээр “…Газрын тосны газрын экс дарга А цагдан хорих 461 дүгээр ангид хоригдож байхдаа амиа алдсантай холбогдуулан түүнийг огцруулах ёстой” гэж үзсэн. Засгийн газар тэр дагуу хариуцлага тооцож байв.
Мөн 2019 оны эхээр Цагдан хорих 461 дүгээр ангид саатуулагдаж байсан гавъяат хуульч, шүүгч асан Б амь насаа алдсан. Үүнтэй холбоотойгоор ШШГЕГ-ын дарга Ц.Амгаланбаяр талийгаач амь насаа алдсан өдөр үүрэг гүйцэтгэж байсан давхрын харуул хамгаалалтын үүрэг гүйцэтгэж байсан хамгаалалтын ажилтан, харуул хамгаалалт эрхэлсэн дэд дарга, ерөнхий жижүүр, дүрс бичлэгийн ажилтан, ерөнхий эргүүл, ээлжийн дарга нар болон тус газрын даргыг “…Ажлын байран дээр хяналтаа сулруулж, хариуцлага алдсан” шалтгаанаар чөлөөлсөн. Дараахан нь сарын дараа өөрөө чөлөөлөгдөх хүсэлтээ гаргаж байв. Засгийн газар ч ёсоор болгосон.
Ийм л хатуу чанга хариуцлагатай албан тушаал л даа, ШШГЕГ-ын дарга гэдэг чинь. Гэтэл Д.Загджавыг томилогдсоноос хойш удалгүй дээрх асуудлууд дараалан гарсан ч Засгийн газар ямар нэг арга хэмжээ авсангүй. Тэр дундаа харьяалах чиг үүргийн сайд нь болох Х.Нямбаатар энэ талаар ам ангайхгүй байгаа нь анхаарал татаад байгаа юм. Уг нь дээр хэлсэнчлэн Х.Нямбаатар сайд ам ангайх болгондоо л хариуцлагын талаар ярьдаг. Сүүлд цагдаагийнхныг яалаа даа. Цагдаагийн алба хаагч сэтгүүлчтэй зүй бус харьцсан гээд ЦЕГ-ын дарга, удирдлагуудад “…Цаашид ийм үйлдэл гарвал та нартай хариуцлага тооцно шүү” гэж байв. Харин ШШГЕГ-ын даргын шил дарсан олон үйлдэл дээр таг дуугүй. Иймээс “…Засгийн газрын “…Хариуцлага тооцох” бодлого Д.Загджавт хамаагүй юм байна гэцгээж байна шүү, Х.Нямбаатар сайд аа. Бас “…Д.Загджавыг эрхлүүлэх ямар шалтгаан Х.Нямбаатарт байна вэ” гээд яриад эхэллээ. Тэр ч бүү хэл үйлдэл хийгээд бус үг хэлээд “хөөгдсөн” хүмүүс ч Д.Загджавтай барьцаж заргалдаад албан тушаалдаа буцаж томилогдох нөхцөл үүслээ.
Эх сурвалж: “Зууны мэдээ” сонин
