Монгол Улсын их сургуулийн багш, ажилтнууд өчигдөр Ерөнхийлөгч У.Хүрэлсүх, Ерөнхий сайд Л.Оюун-Эрдэнэ, Улсын Их хурлын гишүүд болон Боловсрол, шинжлэх ухааны сайд Л.Энх-Амгаланд шаардлага хүргүүлжээ. Тодруулбал, МУИС-ийн удирдлагыг сонгон шалгаруулалтаар сонгох ёстой ч өнгөрсөн таван жилийн хугацаанд түр орлон гүйцэтгэгч гурван удаа томилсон байна.

Тиймээс МУИС-ийн багш, ажилтнууд шаардлагадаа Нэгдүгээрт, МУИС-ийн захирлын сонгон шалгаруулалтыг одоогийн мөрдөгдөж байгаа хууль, дүрэм, журмын хүрээнд ил тод, нээлттэй, өрсөлдөх тэгш боломжтойгоор зохион байгуулах, сонгон шалгаруулалтын товыг мэдэгдэх,

Хоёрдугаарт, Нэг орлон гүйцэтгэгчийг өөр түр орлон гүйцэтгэгчээр сольдог хууль бус жишгийг таслан зогсоох зорилгоор Боловсрол, шинжлэх ухааны сайдын 2022 оны 10 дугаар сарын 11-ний өдрийн Б/88 тоот тоот тушаалыг хүчингүй болгохыг шаарджээ.

Түүнчлэн шаардлагынхаа хариуг энэ сарын 21-ний өдөрт багтаан авах бөгөөд заасан хугацаанд хариу өгөөгүй тохиолдолд тэмцлийн дараагийн хэлбэрт үе шаттай шилжинэ гэдгээ мэдэгдэв.