Монголын Ардчиллыг арван хуруу шигээ мэдэх амьд түүхийн гэрч ахмадууд, анхдагчид олон. Тэд хэвлийгээс төрсөн үрээс нь ялгаагүй Ардчилсан намдаа үнэнч. Хазайхад нь түшиж хамгаалж тэмцэж босгосон ардчиллын бат цайзаа авч үлдэх гэсэн тэдний хүслийг зарим нэг сандалдаа бөгсөөрөө наалдсан асан дарга бүдүүлгээр үл тоох болоод удлаа. Уг нь Ардчилсан намын дүрэм журам, бүтэц зохион байгуулалт нээлттэй, ил тод эрүүл. Иймээс ч их ардчилсан нам ид тарчилсан.

Харин дугаар хорооны ардчилсан намын гишүүдийн дуу нэгтэй өгүүлдэг нэг л зүйл бий. Тэр нь эрүү, иргэний олон гэмт хэрэгт нэр холбогдож итгэл найдвар нэгэнт барсан С. Эрдэнээд голдоо ортол гомдож, тэдний сонголт, хүсэл, сонирхлыг уландаа гишгэж байгаад харамсах. Хэзээнээсээ дээрэнгүй МАН-ын атганд нэгэнт сулрах аргагүй орсон иргэн С. Эрдэнэ АТГ-т хэрэг үүсгэгдэн шалгагдаж байгаа гэдгийг нь ч саяхан ардчиллынхан тод томруун нотолсон. Харин сайд Амарбаясгалангийн “Ардчилсан намын дарга С. Эрдэнэд” гэх утгатай албан бичиг нь үнэндээ Эрдэнээ бид чамайг л хүсэмжилж байна гэж ил зарласан хэрэг боллоо.

Асар их уруудан доройдолт, хариуцлага, хяналтгүй зудын байдалтай нийгмийн хямралын гол буруутан эрх баригч намын “ял үүрэлцэх” гавъяатай нь яах ч аргагүй
С. Эрдэнэ мөн. Тэр намаа удаа дараалан МАН -ын өмнө зоогийн ширээн дээр сул тавьж өгсөн. Хариуд нь авилга албан тушаалын гэмт хэрэгээ хүрз шороо манарган булуулсан. Гэвч булавч бултайна, даравч далдайна.

Монгол Улсын дээд шүүхийн бүртгэлд Ардчилсан намын даргаар хэн нэгнийг бүртгээгүй. АТГ саяхан иргэн Содномзундуйн Эрдэнээд холбогдох хэргийг мөрдөн шалгаж байгааг зарласан. Гэмт хэрэгт шалгагдаж байгаа, намын даргад нэрлэгдэх хууль эрх зүй, ёс суртахууны ямар ч бололцоогүй нөхрийг Ардчилсан намын дарга хэмээн цоллох МАН-ын генсек, ЗГХЭГ-ын дарга ямар бодолтойгоо ард түмэнд шууд зарлав.

Ардчилсан намын бодит 180 мянган гишүүний 117 мянгынх шууд цаасан саналаар нэгэнт сонгогдсон Х. Баттулгаас юунд ингэтэл айна вэ.