Бүгд Найрамдах Солонгос Улсын томуугийн эсрэг вакциныг Өрхийн эрүүл мэндийн төвүүдэд хийж байна. Улирлын томуугийн эсрэг “GCFLI Quadrivalent” дөрвөн цэнт вакцин нь 2022, 2023 оны томуугийн улиралд ДЭМБ-ын зөвлөмж болгосон томуугийн вирусний эсрэгтөрөгчийг идэвхгүйжүүлж гаргаж авсан, ДЭМБ-ын итгэмжлэл авсан вакцин юм.
Вакцины найрлагад орсон томуугийн вирусний дөрвөн дэд хэв шинжээр үүсгэгдсэн халдвараас сэргийлэх зорилгоор хэрэглэнэ.
Вакцинд 1-5 настай хүүхдүүд, 65-аас дээш настай ахмадууд, жирэмсэн ээжүүд хамрагдана. Жирэмсэн болон хөхүүл эмэгтэйчүүдийг вакцин хийхийн өмнө эмчийн үзлэгт хамруулна. 14-36 долоо хоногтой жирэмсэн эмэгтэйд томуугийн вакцин хийж болно.
ЭСРЭГ ЗААЛТ:
-Сүүлийн 1 сарын хугацаанд өөр ямар нэг вакцинд хамрагдсан бол
-Цочмог халдвар, архаг өвчний сэдрэлийн үе;
-Вакцины найрлагад орсон бодист анафилаксийн урвал илэрч байсан өгүүлэмжтэй;
-Өндөг, тахианы гаралтай бүтээгдэхүүнд хэт мэдрэг хариу урвал өгч байсан;
-Сүүлийн нэг жилийн хугацаанд таталт, саажилтын хам шинж илэрсэн;
-Мэдрэлийн үрэвслийн хам шинжийн үе;
-Харшил, багтраа өвчтэй хүн;
-Дархлал дутмагшилтай хүн;
-Дааврын эмчилгээ болон дархлаа дарангуйлах, дархлаа сэргээх эмчилгээ хийлгэж байгаа хүн;
-Хавдрын эмчилгээний цитостатик эм хэрэглэж байгаа бол.
ДАРХЛААЖУУЛАЛТЫН ДАРААХ УРВАЛ ХҮНДРЭЛ:
Халуурах, толгой өвдөх, чичрэх, ядрах, тайван бус болох, хоолонд дургүй болох, бөөлжих зэрэг ерөнхий, тариулсан газарт улайх, хөндүүрлэх, хавдах зэрэг хэсэг газрын урвалын шинж илэрч болох бөгөөд 2-3 өдрийн дараа хэвийн байдалд ордог.
Ховор тохиолдолд: Толгой эргэх, цочмог ханиах, архаг ринит, хоолой өвдөх, залгиурын үрэвсэл, хамрын салст бүрхэвчийн үрэвсэл илэрч болно.
Маш цөөн тохиолдолд: Бөөлжих, суулгах, дотор муухайрах, чонон хөрвөс гарах, анафилаксын шок, энцефаломиелит, татах, мэдрэлийн өөрчлөлтүүд 2 долоо хоногийн дотор илэрч болно. Хэрэв дээрх шинж тэмдгүүд илэрвэл эмч, эрүүл мэндийн байгууллагад яаралтай мэдээлж, эмчийн зааврын дагуу эмчилгээг хийх хэрэгтэй.
