Монгол Улсын Ерөнхийлөгчийн ивээл дор Төрийн ордонд зохион байгуулсан “Хүнсний хангамж, аюулгүй байдал-Мал аж ахуй” сэдэвт үндэсний чуулган өндөрлөлөө.

Чуулганд мал аж ахуйн салбарын төрийн болон төрийн бус байгууллага, эрдэм шинжилгээ, судалгаа, шинжлэх ухааны болон олон улсын байгууллага, хувийн хэвшлүүд, малчид, фермер зэрэг 800 төлөөлөгч оролцлоо.

Чуулганаар төрөөс мал аж ахуйн салбарт хэрэгжүүлж буй бодлого, шийдвэрийн талаар мэдээлэл авч, малчдын нийгмийн хамгаалал болон салбарын хөгжил, дэвшил, гарц, шийдэл, малын эрүүл мэнд, махны эрүүл ахуй, аюулгүй байдлын талаар хэлэлцлээ.

Монгол Улсын Ерөнхийлөгчийн Тамгын газрын дарга Я.Содбаатар үндэсний чуулганыг хааж үг хэллээ.

Тэрбээр чуулганы үеэр дэвшүүлсэн санал, санаачилгыг ажил хэрэг болгох талаар Ерөнхийлөгчийн Тамгын газар анхаарч, төрийн болон төрийн бус байгууллага, мэргэжлийн холбоодын хамтын ажиллагаа, олон улсын болон донор байгууллагын оролцоог дэмжин ажиллахаа илэрхийлэв.

Чуулганыг Монгол Улсын Ерөнхийлөгчийн Тамгын газар, Хүнс, хөдөө аж ахуй, хөнгөн үйлдвэрийн яам, Нэгдсэн үндэстний байгууллагын Хүнс, хөдөө аж ахуйн байгууллага хамтран зохион байгууллаа.